انفجار قلم

نفسي أكتب من زمان

عايز أكتب حاجات كتير

عايز أكتب عن القلم اللي نسيت الكتابة بيه وبقى خطي وحش من الكتابة ع الكيبورد

وعايز أكتب عن التغييرات الجذرية المرعبة اللي مقدم عليها في حياتي ...

وعايز أكتب عن إني مضغووووووووووووط ومش راضي عن أدائي ... حاسس إني جوا حلة برستو ... شغال تحت ضغط رهييييييييييب ... وعمال باعذب في نفسي واتحرك بأقصى سرعة والحركة أسرع بتكسرني والكسر بيزيد ضعفي ...

عايز أكتب عن أحلام خايف تقتل ... عن زرعة أمل جوايا زرعتها وكنت كل يوم باسقيها وأرعاها وبدإت تكبر وتكبر قدامي ... وفجأة خايف أقتلها بإيدي ...

عايز أعيط ... ومش باعرف ... مش عارف أبكي ... مش باعرف ...

عايز أصلح حاجات كسرتها وجرحتها كتير في نفسي ...

عايز أحوش ... باصرف كل مرتبي تقريبا ... مش باحوش حاجة خالص ... ومش عارف أحوش ...

عايز أنظم وقتي .... يااااااااااااااااااااااه كابوس تنظيم الوقت المخيف ... عامل في حياتي زي القنبلة المؤقتة لو انفجرت في مرة هتدمرني ...

عايز اتصل باصحابي ...

عايز ما انساش أنا مين ...

فقدت الإحساس بالزمن وبالمكان ... والذاكرة بقت أحلام .... واﻷحلام تفكير مستمر ... في اليقظة زي في المنام ... الفرق الوحيد إنه في المنام لا تحكمني قوانين الفيزياء ....

باطير وأنا صاحي ... وما اعرفش إني كنت نايم ...

عملت حادثة مع واحدة صاحبي وكانت حادثة مرعبة والحمد لله طلعت سليم بس حاسس إني كنت باحلم وفي منام ...

12 منتصف الليل زي بالظبط 12 ظهرا ...

نمت زي ما نمتش ...

مجنون زي عاقل ...

بافكر زي نايم ...

نايم زي باشتغل ومطحون ...

باشتغل زي سرحان ...

وسرحان زي باحلم ...

وباحلم يعني تفكير مستمر مش بينقطع من اليقظة لمنام ...

وتفكير يعني واقع ... يعني مش حلم ..

والعالم مش محسوس ... مش مدرك ... زي أعماق حلم عمييييييييييييييييييييييييييييييييييييييييق ... متاهة

والزمن بيمر غصب عني ... ﻷني مش عارف أحسه ...

والمكان ما اعرفهوش وعارف كل تفاصيل ...

والناس ... نسيتهم خلاص ... اللي معايا ما اعرفوش ... واللي ما شفتوش اتنسى ... حتى لو محفور في الذاكرة ..

والذاكرة خلاص منهكة ... كل يوم تقول لي مرات عديدة "لا توجد مساحة فارغة يرجى مسح بعض البيانات لكي تتمكن من التخزين" ...

ربنا يستر وما يكونش فيها باد سيكتورس ...

ولعت نفسي شمعة ... بانور لناس ... وأحرق نفسي ... مش تضحية ... ﻷ ده حمق ... كان اﻷولى بي أن أضيء لنفسي معهم ...

وقلق واضطراب ... عارف سببه كويس ... بس أنا منفصل عن العالم ... هوا اللي بيحلم ده لو عرف حل كل حاجة في الدنيا هيعرف ياخد أي قرار؟؟؟

يارب ارحمني .... ارحمني عشان تعبت ...
ارحمني عشان من غير رحمتك هاضيع ...
ارحمني أرجوووووووووووووك ...
برحمتك أستغيييييييييييييييييث فأغثني ...
ما حدش يعرف عني حاجة غيرك ولا حد يعرف لي حل غيرك أرجوك اصلح لي شأني ... أغثني برحمتك ... أغثني برحمتك ..
مش عارف بس باضيع وقت في إني ألاقي حل بعيد عنك ليه ...
مش عارف ... غبي ... غبي ... غبي ...
ألهمني الرشد أرجوووووك ... أرجووووووك ربي ألهمني الرشد ...

والله ما عاد قلبي ولا عقلي يطيقان ...... أغثني برحمتك يا رحمن ..

جاءنا الخبر اليقين

جاءنا الخبر اليقين

أن صاحب عرش مصر المكين

قد أمر بالهدية

تقدم للشعب عرفانا وتحية

تعديلات مبهرة

للدستور مدمرة

لذيذةٌُ جميلةُُ

كقطتي نيرة

لكل فرد حقهُ

كامل لا ينتقص

في أن يحوز وحده

زنزانة كالفقص

ولكل مظلوم صلاحية

ان ينهق ما شاء في البرية

ولكل ضحية

ان يستنجد بالدستور
وان يرفع الشكوى

للحاكم الجسور

لتحل له القضية

وتستبدل زنزانته السوداء

بزنزانة وردية

واقعة عجيبة

موضوع كده حصل لي يوم 30 نوفمبر 2006

ودي نص محادثة بيني وبين صديق ليا بعد ما حصل بشوية صغيرين

Amr: فيه حاجة غريبة كده حصلت لي من شوية ...
A doctor Freind: ??
Amr: أنا كنت شغال عادي من الساعة 1 ... المهم ... الساعة 7 وشوية كده جبت أكل يعني ...
A doctor Freind: كويس
Amr: وبعدين بعد ما أكلت حسيت إني عايز أنام جامد جدا ... وما كنتش قادر أقاوم
A doctor Freind: عادي
Amr: المهم
Amr: قلت أريح على أي مكتب عندنا في الشركة

A doctor Freind: ماشي ياريس....المهم نمت على مكتب المد
Amr: هوا بس بيبقى محتاج متابعة ... بس أنا نمت ...
A doctor Freind: مكتب المدير ولا إيه؟
Amr: ههههههه ﻷ ﻷ
Amr: جيب على مكتب فاضي ... وحطيت كرسي ... ونمت ...
Amr: نمت حوالي ساعة وربع ... من 8 إلا ربع ل 9
A doctor Freind: حلوين
Amr: طبيعي لغاية كده
A doctor Freind: تمام
Amr: كنت نايم اﻷول ودماغي على المكتب نفسه ... بعدين فقت الساعة 9 وكنت عايز أصحي بقى ... فريحت دماغي لورا
Amr: يعني حاولت أنام وأنا قاعد عادي جدا ... وساند ظهري على الكرسي ودماغي على الحيطة
Amr: دقيقتين .. 3 وحاولت أقوم ما عرفتش
A doctor Freind: عظيم
A doctor Freind: ؟؟
A doctor Freind: معرفتش إزاي؟
Amr: مش قادر أشد دماغي من على الحيطة لقدام
A doctor Freind: مش قادر ولا مكسل؟
Amr: زي ما يكون مثلا فيه مغناطيش قوي جدا ومش قادر أقولمه
Amr: أقاومه*
A doctor Freind: مممممم......ممكن من الإرهاق الشديد
Amr: ومش قادر افتح عيني
Amr: الطبيعي إن اتكفي لقدام مش الزق في الحيطة لورا
Amr: فتحت عيني مرة بالعافية
Amr: واتقفلت تاني وما قدرتش افتحها
A doctor Freind: مقدرتش يعني حاسس
Amr: فيه شركة تانية معانا في نفس الشقة وفيه ناهم لسه موجودين ...
A doctor Freind: إن جفونك تقيلة
Amr: تقيلة جدا ...
Amr: بقاوم بكل قوتي إني افتحها ومش قادر
A doctor Freind: :|
Amr: حاولت اتكلم
A doctor Freind: بس ده حاجه طبيعية في حالة الإرهاق الشديد
A doctor Freind: يعني الموضوع مش حصلك فاجئه مثلا
A doctor Freind: مفيش داعي للقلق
Amr: بقى نفسي حد من الشركة التانية ييجي ويشدني يقومني
Amr: ﻷ اللي قالقني في الموضوع إني بدأت استجمع كل قوايا
Amr: عشان أقوم بدأت اﻷول أحاول أوصل إيدي للمكتب عشان امسك فيه واشد نفسي
A doctor Freind: وطول الوقت ده إنت كنت واعي
A doctor Freind: ولا نايمان
Amr: وبدأت أركز بشده إني بس ابعد دماغي عن الحيطة ولو سنتيمتر واحد
Amr: ﻷ واعي ... وسامع التيلفون وهوا بيرن ... وسامع صوت أحد من واحد في الشركة وهما ماشيين وبيبفتحوا الباب
Amr: بدأت أركز جدا إني بس ابعد دماغي عن الحيطة
Amr: بقيت ازقها لقدام ييجي نص سنتيمتر وترجع تاني
Amr: حوالي 5 دقايق
A doctor Freind: مممم...وبعيدن؟
Amr: لغاية ما شوية شوية بعدتها حوالي سنتيمتر
Amr: وبدأت أقرب إيدي من المكتب ... لغاية ما مسكت فيه ... وكنت باحرك إيدي بالعافية ...
Amr: ولساني تقيل جدا مش قادر اتكلم
Amr: مسكت في المكتب وبدأت اشد نفسي
Amr: أخدت وقت برضه
Amr: لغاية ما قمت
Amr: يعني قعدت حوالي ربع ساعة أو تلت ساعة بالشكل ده عبال ما قمت
A doctor Freind: وبعدين؟
Amr: بس ... قمت بقى ... عادي
A doctor Freind: وبعد ما قمت كان إيه النظام؟
Amr: قمت عادي جدا ...
Amr: ورحت المطبخ عشان اعمل لي كباية شاي ...
A doctor Freind: بدون أي تقل؟
Amr: أيوة
A doctor Freind: ممم...ديه غالبا
A doctor Freind: pyschosomatic condition
Amr: يعني إيه ...
Amr: :)
A doctor Freind: يعني حالة من حالات التأثير النفسي على الجسد
A doctor Freind: لإن مفيش حالة شلل كلي يتظهر فاجأة وتختفي فاجأة
Amr: أيوة ... ممكن فعلا ...
Amr: بس تفتكر ده ممكن ليه علاقة بالإرهاق في الشغل؟
A doctor Freind: وارد جدا......
Amr: خير إن شاء الله

ياه أخيرا

أخيرا وبعد طول عناء
وبعد أن مللت أنا من كثرة انتظاري
أنجزت الشكل البدائي
لما كنت أنوي أن يكون مدونة
وأخيرا خرجت إلى النور مدوتني
بعد تجربة العديد من البرامج واﻷشكال والسمات

لعلي أكتب فيها يوما فرحي وحزني ...
وحماستي وكآبتي

لعلي أكتب ما أردت أن أسجل لبضع سنين

واضعت الكثير ما بين اهمال الكتابة
والكتابة باهمال
واهمال المكتوب


مدونتي أكتبها لنفسي
أسجل فيها ما يدور بخاطري
أينما وحينما يدور
لعلي أعود إلى قراءته يوما
فأستفيد من خبرة
أو أضحك على تجربة
أو احمد الله على أزمة مرت

أكتب ﻷني أجد في الكتابة مسليا
أكتب مرة بالعامية
ومرة بالعربية الفحصى
ومرة بين تلك وهذه
ومرة بالإنجليزية

ومرة ... ربما بلغة أخرى لم أعرفها بعد

ما يهمني اﻵن أني قررت الكتابة
سأكتب عني كما أنا
واكتب عما أراه كما هو
كما تلقاه عقلي وتلقفته جوارحي
بمنتهى البساطة
وربما تعقيد أحيانا ﻷني تلقيته مقعد فاسجله كما هو

أكتب هنا لوحدي لكي لا يشرف أحد على كتابتي
ولا يقيدني

لعلي أجمع ما كتبت من قبل من متناثرات
ما بين وريقات
ومنتديات

الخلاصة
أنا سعيد جدا أني سأكتب دون قيود ودون تكلف