tag:blogger.com,1999:blog-1326504627034329396.post-30977516676178273622008-01-20T01:16:00.000+02:002008-01-20T02:37:44.752+02:00<div dir="rtl" style="text-align: right;">مع بداية مرحلة المراهقة والتقلبات الشديدة في حياة الإنسان ... والذنوب اللي ما كانش هوا وصغير يتخيل إنه ممكن يعملها وبداية توسع مداركه ومعرفته الواعية بدينه ... اصطدمت بنفسي ... وفي الفترة دي كان كل استقبالي سلبي ... يعني كنت كاره نفسي وباحتقرها جدا ومتضايق منها ... وكان للموضوع ده أسباب رئيسية زي إن الواحد ما كانش فاهم قوي إزاي لما يسمع موعظة أو نصيحة يستقبلها إيجابيا مش سلبيا ... يعني مثلا لو سمعت أو قرأت عن خشية الله .. ممكن أستقبل الكلام سلبي وأحس إن رايح في ستين داهية ومافيش مني أمل وده اللي كان بيحصل في الفترة دي .. وممكن أستقبله إيجابيا بإني استغفر ربنا عن ما مضى وأحاول أن أصلح ما هو قادم وأندم ندما يدفع للعمل الطيب لا إلى اليأس والقنوط ..<br /><br />فكنت باكره نفسي جدا ...<br />بعدها لقيت إن ده كله مالهوش لازمة وإنه غباء شديد ... ﻷنه لا منى باصلح الوضع ولا مني مرتاح وطبعا شعور بقى باليأس والاحباط بشدة .. بس الواحد لما بدأ يفهم شوية لقيت إن أحسن حاجة الواحد يعملها إنه يتصالح مع نفسه ... ويقيم مع نفسه علاقة ندية وليست علاقة عداء شديد أو ولاء وحب شديد ..<br />يعني احترم نفسي ... وأقدرها ﻷن ربنا خلقها .. وﻷنها لو أحسنت فربنا هيرضى عنها ...<br />وأكره فيها البلاوي السودة اللي بتعملها ...<br />وأمشي معاها بتوازن ... لما تفرح وتغتر أفكرها بسوء أدبها ...<br />ولما تياس وتحبط أفكرها بإن فيها روح من الله نفخها في الطين ... وإن فيها استشراف للسمو ... وإنها وإن كانت عاصية فإنها تحب الطاعة ...<br /><br />مش راضي عن نفسي ... ﻷني ما ينفعش أرضى ... أرضى بإيه بس ... هيا لست عملت حاجة تستاهل الرضى ... بس في نفس الوقت أشجعها لما تعمل ولو شيء بسيط كويس بإنها ممكن تكون أفضل لو شدت حيلها شوية كمان ...<br /><br /><br />بافرح بيها جدا لما تكتسب خلق حسن أو تتخلص من خلق سيء ... وأكتر حاجة بافرح بيها لما تتهان شوية وتتجرح بس لله مش لحد تاني ومن غير ما تنتصر لنفسها ﻷنها عارفة كويس إن لو الناس عرفت حقيقتها المُرّة هتكون الإهانة أبشع ...<br /><br />وأكرهها جدا لما تزرجن بقى معايا وتنتخانق مع بعض عشان مش عايزة تسمع الكلام وكسلانة عن الخير وعايزة بس تاكل وتشرب وتمشي ورا مزاجها وبس ... وأكتر موقف باكرهها فيه لما أحس إني ضيعت وقت في معصية أو حتى بدون فايدة تذكر ... ولما ألاقيها عملت عمل كويس جدا بس نسيت تنويه لله أو نيتها فيه باظت ...<br /><br />باحس إنها ممكن تكون أفضل كتييييييييييييير قوي بس لو تسمع كلام ربنا وتعيش الحياة كلها لله زي ما ربنا يرضى ... وباحبها بس ﻷني متأكد إنها ممكن توصل لكده يوما ما ... بس دماغها الناشفة دي عايزة الضرب بالحديد ...كنت زمان باضرب ... بس دلوقتي مش باضرب عشان احنا اصحاب وماحدش بيضرب صاحبه إنما ممكن ينصحه ويعنفه كمان إن لزم ..<br /><br />أسأل الله أن يرزقني نفسا مطمئنة بالإيمان<br /></div>Amr_not_Amrhttp://www.blogger.com/profile/13587127328874582386noreply@blogger.com