غزة تحت الظلام

روجيه جارودي ... كيف يحتاج العالم إلى الإسلام

ده مقال عن روجيه جارودي ... بصراحة من أجمل ما قرأته ملخصا عنه ...
المقال بعد قراءته زود إيماني العميق بحاجة هذا العالم إلى الإسلام ... يعني الراجل بيقول مثلا "ماذا بعد المزيد والمزيد من إنتاج السيارات والماكينات وأجهزة الكومبيوتر؟ ماذا بعد المزيد والمزيد من البنوك والأرباح المالية؟ ماذا بعد المزيد والمزيد من المدن والطرق والمصانع؟ إلى أين سنصل بعد ذلك.. وأين النمو في القيم والأخلاق والمعاملات والسعادة الحقيقة؟" ... وأفتكر إن دي إشكالية حقيقية بتواجه كل الناس بيدعوا لعزل الإسلام عن الحياة ... وإبعاده عن تنظيم كل شؤون البشر ...
يعني فيه نقطتين من وجة نظري:
اﻷولى: إن الإنسان ما ينفعش -زي ما العلمانيين في الحقيقة وليس في الدبلوماسية بينادوا- يفصل الإسلام كدين يعتنقه عن معاملاتاه وتجارته وسياسته ... وإلا هيشعر بازدوجية واضطراب وعدم استقرار تهدد بناؤه النفسي وحتى إنتاجه ...
الثانية: إنه المغزى الحقيقي والهدف غير واضح بعيدا عن التصور الإسلامي ... يعني مهما أنكر المنكرون فالحياة المادية مهما بلغت فيها من نجاح فمش بتعوض الإنسان عن الحاجة للإيمان وامتثاله كسلوك وأخلاق ... يعني قرأ إحصائية العام الماضي بتقول إن 90% من ممثلي هوليود يشربون الكحوليات و 60% مدمنون بشراهة ... طيب إذا كان دول وصلوا لقمة المجد المادي في المنظور العلماني الغربي !!

ومن هنا يزداد إيماني بأن الغاية من نضال المسلمين ودعوتهم لدينهم ليس فقط دخول الناس في الإسلام إنما أن يصير الإسلام مهيمنا وحاكما على حياة الناس "حتى لا تكون فتنة ويكون الدين كله لله" ... واﻵية لا يتعني إكراه كل الناس على الإسلام -إن الإكراه منهي عنه أصلا- إنما أن يكون الإسلام هو الحاكم على كل الناس ..

أنا ونفسي .. أصدقاء ولكن!

مع بداية مرحلة المراهقة والتقلبات الشديدة في حياة الإنسان ... والذنوب اللي ما كانش هوا وصغير يتخيل إنه ممكن يعملها وبداية توسع مداركه ومعرفته الواعية بدينه ... اصطدمت بنفسي ... وفي الفترة دي كان كل استقبالي سلبي ... يعني كنت كاره نفسي وباحتقرها جدا ومتضايق منها ... وكان للموضوع ده أسباب رئيسية زي إن الواحد ما كانش فاهم قوي إزاي لما يسمع موعظة أو نصيحة يستقبلها إيجابيا مش سلبيا ... يعني مثلا لو سمعت أو قرأت عن خشية الله .. ممكن أستقبل الكلام سلبي وأحس إن رايح في ستين داهية ومافيش مني أمل وده اللي كان بيحصل في الفترة دي .. وممكن أستقبله إيجابيا بإني استغفر ربنا عن ما مضى وأحاول أن أصلح ما هو قادم وأندم ندما يدفع للعمل الطيب لا إلى اليأس والقنوط ..

فكنت باكره نفسي جدا ...
بعدها لقيت إن ده كله مالهوش لازمة وإنه غباء شديد ... ﻷنه لا منى باصلح الوضع ولا مني مرتاح وطبعا شعور بقى باليأس والاحباط بشدة .. بس الواحد لما بدأ يفهم شوية لقيت إن أحسن حاجة الواحد يعملها إنه يتصالح مع نفسه ... ويقيم مع نفسه علاقة ندية وليست علاقة عداء شديد أو ولاء وحب شديد ..
يعني احترم نفسي ... وأقدرها ﻷن ربنا خلقها .. وﻷنها لو أحسنت فربنا هيرضى عنها ...
وأكره فيها البلاوي السودة اللي بتعملها ...
وأمشي معاها بتوازن ... لما تفرح وتغتر أفكرها بسوء أدبها ...
ولما تياس وتحبط أفكرها بإن فيها روح من الله نفخها في الطين ... وإن فيها استشراف للسمو ... وإنها وإن كانت عاصية فإنها تحب الطاعة ...

مش راضي عن نفسي ... ﻷني ما ينفعش أرضى ... أرضى بإيه بس ... هيا لست عملت حاجة تستاهل الرضى ... بس في نفس الوقت أشجعها لما تعمل ولو شيء بسيط كويس بإنها ممكن تكون أفضل لو شدت حيلها شوية كمان ...


بافرح بيها جدا لما تكتسب خلق حسن أو تتخلص من خلق سيء ... وأكتر حاجة بافرح بيها لما تتهان شوية وتتجرح بس لله مش لحد تاني ومن غير ما تنتصر لنفسها ﻷنها عارفة كويس إن لو الناس عرفت حقيقتها المُرّة هتكون الإهانة أبشع ...

وأكرهها جدا لما تزرجن بقى معايا وتنتخانق مع بعض عشان مش عايزة تسمع الكلام وكسلانة عن الخير وعايزة بس تاكل وتشرب وتمشي ورا مزاجها وبس ... وأكتر موقف باكرهها فيه لما أحس إني ضيعت وقت في معصية أو حتى بدون فايدة تذكر ... ولما ألاقيها عملت عمل كويس جدا بس نسيت تنويه لله أو نيتها فيه باظت ...

باحس إنها ممكن تكون أفضل كتييييييييييييير قوي بس لو تسمع كلام ربنا وتعيش الحياة كلها لله زي ما ربنا يرضى ... وباحبها بس ﻷني متأكد إنها ممكن توصل لكده يوما ما ... بس دماغها الناشفة دي عايزة الضرب بالحديد ...كنت زمان باضرب ... بس دلوقتي مش باضرب عشان احنا اصحاب وماحدش بيضرب صاحبه إنما ممكن ينصحه ويعنفه كمان إن لزم ..

أسأل الله أن يرزقني نفسا مطمئنة بالإيمان

يوما ما لم أكن أعرف شيئا عما أتقنه اﻵن

قبل ما يزيد على ثلاث سنوات ... كنت مشاركا في أحد المنتديات وافتتحت موضوعا أسأل فيه "هل من الممكن أن أستضيف موقعي؟" ... كنت أسأل فيه أسألة بدائية للغاية بل سخيفة وساذجة أحيانا ... وتعرفت من خلال هذا الموضوع على أعز أصدقائي "عمرو" والذي يكتب في الموضوع باسم amr922 ... وصرنا رفاق طموح وأصدقاء أوفياء -بفضل الله- لم يضف إلينا الزمن وتقلب الليل والنهار إلا مزيدا من الحب والإخلاص والوفاء ... ولم أشعر يوما واحدا أنني أخطأت حين اتخذته صديقا صدوقا لي أو أنني نادم على لحظة واحدة قضيناها معا: نعمل أو نلعب أو نتسامر أو تنتاقش أو حتى نختلف بحدة ... وقدر الله أن عملنا معا في مكان واحد بعد تعارفنا بحوالي العام والنصف وصار كل منا خبيرا -صغيرا- في نفس هذا الموضوع الذي كنت أسأل عنه ... وبعدها وعندما كان زملاؤنا الجدد وحتى مدراء العمل يستعجبون كيفية لقائنا وتعارفنا وكيف أننا تعلمنا -وخصوصا أننا من محافظتين مختلفتين- فكنا نطلعهم على هذا الموضوع ... فينفجرون جميعا ضاحكين متعجبين أن هذا الساذج الذي كان يسأل هو من يسألونه اﻵن وأن هذا الذي تطوع بالإجابة والإعانة هو من يقدم إليهم العون دائما دون تررد أو من أو أذى ...

فأقول "سبحانك لا علم لنا إلا ما علمتنا إنك أنت العليم الحكيم"

أنقل هذا الموضوع هنا من مصدره اﻷصلي ﻷتذكر فضل الله علي ... ووفاءا ﻷخي وصديقي عمرو ... وﻷنه يبعث في نفسي الكثير من اﻷمل والذكريات العذبة ...

بتاريخ .. 09-14-2004, 02:34 AM

Amr_not_Amr

هل من الممكن أن استضيف موقعي؟؟؟؟

---

السلام عليكم
سؤال
هل ممكن أني استضيف الموقع بتاعي على جهازي
أنا مثلا عندي جهاز سريع جدا
والسعة التخزينية كبيرة
وسرعة الاتصال بالانترنت عالية
فهل ممكن بدل ما اروح ادفع فلوس لسيرفر أني اعمل جهازي سيرفر للموقع واشغله 24 ساعة واستصيف الموقع عليه؟؟؟؟؟
لو ينفع ... إيه الطريقة؟؟؟؟
ارجوكم تفيدوني

++++++++++++++++++++++++++++++++++++
مرفوع مؤقتا من الخدمة
اباتشى سيرفر

او iis وانا منصحكش بفيرجن 5 خليك فى 6 الى نازلة مع سيرفر2003


++++++++++++++++++++++++++++++++++++
Amr_not_Amr
السلام عليكم
جزاك الله كل خير
بس معلش ياريت لو تكتب الأباتشي سيرفر بالانجليزي عشان البحث
وهو iis اختصار لإيه عشان اعرف أجيبه

وآخر حاجة هو الموقع هيكون ب ip address وللا www.xyz.xyz
يعني الموقع هيكون البشكل ده http:/60.147.25.65/index.html
وللا بالشكل ده www.amr.net/index.html

معلش أصل خبرتي في الموضوع ده شبة منعدمة
وربنا يجزيك كل خير


++++++++++++++++++++++++++++++++++++
الديب
السلام عليكم يا عمرو

الموقع بالنظام ده هايكون بالأرقام
و ما لوش عنوان

لازم تشتري عنوان... وفيه ملحوظة كمان خطيرة
انت مثلا عندك دي اس ال لكن الشركة اللي انت مشترك معاها
كل شوية بتغير الـ أي بي بتاعك..و بكدة عنوان الموقع سوف يشير الى عنوان أي بي مختلف...

اللي أقصده ..ان لازم يكون عندك ستاتيك أي بي من شركة الدي اس ال
و ده يتطلب اشتراك مختلف

لكن والله انا سمعت ان المشكلة دي ممكن تتحل...لكن ماعرفش ازاي؟؟

ايه رأي الأعضاء في الكلام ده

حد عنده معلومات تانية؟؟



السلام عليكم



++++++++++++++++++++++++++++++++++++
مرفوع مؤقتا من الخدمة

مظبوط

بس حكاية ال ip مهى الشركة هتديله ستاتيك ip لان اشتراكه هيبقى بيزنس


مش هوم



++++++++++++++++++++++++++++++++++++
Amr_not_Amr
جزاكم الله كل خير
أنا هافحص الموضوع لسه وأرد عليك إن شاء الله



++++++++++++++++++++++++++++++++++++


amr922

السلام عليكم
بص ياباشا لو ناوى تعمله سيرفر جامد يبقى تستحسن تنزل لينكس ريد هات ومعاه اباتشى وشوية حاجات كده لو بقى عايز تستسهل يبقى على الويندوز العادى
بالنسبة لاسم الموقع فيه حلين واحد بفلوس والتانى ببلاش
اما ان تشترى دومين وده رخيص بحوالى 8 دولار
او ممكن تشترك فى موقع مجانى زى تى كه او اى موقع مجانى وتحط الاندكس صفحة تحويل للايبى بتاعك
اما بالنسبة للايى ففى حلينى بردوا اما تشترى ايبى ثابت من الشركة او فيه موقع اسمه noip بتنزل برنامج بيحللك مشكلة الايبى
ولو احتجت اى حاجة انا تحت امرك

تحياتى

++++++++++++++++++++++++++++++++++++

وبعدها بقى كلمته وكان ما كان بيننا ... فلله الحمد ...


عجيب هو أمر هذا الإنسان عندما يتقن شيئا أو يصبح ذا خبرة وعلم ينسى أنه لم يكن يوما يعلم عنه شيئا ... ويظن -لحمقه وغبائه- أنه تعلم كل هذا بمهارته وذكائه ..